Ныдэлъфыбзэм итхьамаф
Ныдэлъфыбзэм итхьамаф
Мы тхьамафэм адыгабзэм ехьылIэгъэ зэхахьэхэр, зэнэкъокъухэр, тхэн IофшIэнхэр лъэпкъ факультетым щырекIокIых. Ахэр зыфэгъэхьыгъэхэр Адыгабзэмрэ тхыбзэмрэ я Маф.
2000-рэ илъэсым щегъэжьагъэу апэрэ Президентэу Джарымэ Аслъан иунашъокIэ Адыгэ Республикэм щаштагъэу гъэ къэс игъэкIотыгъэу гъэтхапэм и 14-р хэтэгъэунэфыкIы. Факультетым идеканэу
Ахъмэт Джульетэ мэфэкI мафэмкIэ студентхэмрэ кIэлэегъаджэхэмрэ афэгушIуагъ. Тхыбзэм гъогоу къыкIугъэм, Бэрсэй Умарэ гъэхъагъэу иIэхэм, адыгэ лъэпкъым шIуагъэу къыфихьыгъэм къатегущыIагъ. Гъэсэгъэ инмэ Бэрсэим итхылъ осэшхо къызэрэфашIыгъэр, ащ иалфавит бэмэ ящысэтехыпIэу зэрэщытыгъэр къыхигъэщыгъ. ЕджакIохэм Бэрсэй Умар исаугъэт къэгъагъэхэр кIэралъхьагъэх.
Лъэпкъ факультетым тхьамафэр «Адыгэ диктантымкIэ» ригъэжьагъ, къыкIэлъыкIорэ мафэм факультетым истудентхэр, АКъУ-м иколледжэу МГГТК-мрэ кIэлэегъэджэ колледжымрэ ястудентхэр зыхэлэжьэгъэ олимпиадэр факультетым щызэхащагъ.
Мафэр Iэнэ хъураекIэ лъагъэкIотагъ. КIэлэегъаджэхэмрэ студентхэмрэ апашъхьэ адыгэ кафедрэм идоцентэу Шъхьэлэхъо Римэ къыщыгущыIагъ. ШIэныгъэлэжьхэу адыгабзэм фэлэжьагъэхэм
студентхэр нэIуасэ афэхъугъэх, усэхэм къяджагъэх. КъыкIэлъыкIощт мафэм адыгабзэм фэгъэхьыгъэ Iофтхьабзэхэр падзэжьыщтых.