Лъытэныгъэ ин зыфэтш1эу Мэщбэш1э Исхьакъ!
Лъытэныгъэ ин зыфэтш1эу Мэщбэш1э Исхьакъ!
Адыгэ къэралыгъо университетым иректорат, ипрофессорхэр ык1и ик1элэегъаджэхэр агу къаде1эу, лъэшэу ягуапэу илъэс 90-рэ узэрэхъурэмк1э къыпфэгуш1ох!
Гущы1эжъэу «Ш1у ш1и, псым хадз» уироман ышъхьэ закъоу щымытэу, уищы1эныгъи итамыгъэу хъугъэ. Илъэсэу къэпк1угъэхэм к1уач1э къыуатыгъ, уиш1эныгъэ хагъэхъуагъ, уилъэгап1э къа1этыгъ. Адыгэ поэзием мэкъэмак1э къыхэплъхьагъ, лъэгъуак1э фыхэпщыгъ, гупшысэ куук1э уушъагъ. Поэтическэ сборникхэу тын лъап1эу адыгэ лъэпкъым пэбгъохыгъэхэр поэзием ихъарзынэщ щыщ хъугъэх. Адыгэ литературэм жанрэу тарихъ романыр щыбгъэпсыгъ, адыгабзэм ибаиныгъэрэ ищэрыуагъэрэ бгъэ1орыш1эзэ, щы1эныгъэм илъэныкъо пстэури уироманхэм къащыбгъэлъэгъуагъ. Ахэмэ адыгэ гупшысэр а1этыгъ, адыгабзэр агъэлъэгагъ, лъэпкъ тарихъыр тагъэш1эжьыгъ.
Къэк1ощт илъэсхэм уи1офш1эн гухахъо хэбгъуатэу, уипсауныгъэ пытэу, уищы1ак1э дахэу, уигъаш1э к1ыхьэу, ц1ыфэу укъэзыуцухьэхэрэм лъытэныгъэ къыпфаш1эу, уигупшысэ уцугъэхэр къызгуры1он, къыбдэзгощын ык1и лъызгъэк1отэн зылъэк1ыщтхэри уинасып къыхьынэу тыпфэлъа1о!