НЫДЭЛЪФЫБЗЭМ ИМАФ
Мы тхьамафэм адыгабзэм ехьыл1эгъэ зэхахьэхэр, зэнэкъокъухэр, тхэн 1офш1энхэр лъэпкъ факультетым щырек1ок1ых. Ахэр зыфэгъэхьыгъэхэр адыгабзэмрэ адыгэ тхыбзэмрэ ямаф. 2000-рэ илъэсым щегъэжьагъэу апэрэ Президентэу Джарымэ Аслъан иунашъок1э Адыгэ Республикэм щаштагъэу гъэ къэс игъэк1отыгъэу гъэтхапэм и 14-р хэтэгъэунэфык1ы. Лъэпкъ факультетым мафэр ригъэжьагъ «Тхыбзэм итарихъ нэк1убгъохэр» зыфи1орэ лекциемк1э. К1элэегъаджэмэ, студентмэ апашъхьэ къыщыгущы1агъ адыгэ кафедрэм идоцентэу Хьак1эмыз Мирэ. Тхыбзэм гъогоу къык1угъэм, Бэрсэй Умарэ гъэхъагъэу и1эхэм, адыгэ лъэпкъым ш1уагъэу къыфихьыгъэм къатегущы1агъ. Ставрополь гимназием щыригъаджэхэзэ, 1853-рэ илъэсым гъэтхапэм и 14-м Умарэ апэрэеу «Адыгэ букварыр» къыдегъэк1ы араб графикэм тетэу литограф ш1ык1эк1э. Гимназием а букварымк1э адыгэ еджак1охэр щырегъаджэх, ащ алфавитыр, урокхэр, баснэхэр дэтыгъэх. А лъэхъаным щы1эгъэ гъэсэгъэ инмэ Бэрсэим итхылъ осэшхо къыфаш1ыгъ, иалфавит бэмэ ящысэтехып1агъ. Бэрсэй Умарэ «Адыгэ букварыр» къыздигъэк1ыгъэ мафэр адыгэ тхыбзэм имэфэк1эу хэтэгъэунэфык1ы.
Ят1онэрэ лекциеу «Цуамыкъо Тыркубый – к1элэегъадж, усак1о, тхак1о» зыфи1орэр зэхэзыщагъэр доцентэу Ахъмэт Джульет. Ащ къы1отагъ Цуамыкъо Тыркубый 1966-2017-рэ илъэсхэм анэс АКъУ-м зэрэщылэжьагъэр, лъэпкъ факультетым иапэрэ зэрэдеканыгъэр, филологие ш1эныгъэхэмк1э докторыгъ, профессорыгъ, адыгабзэк1и, урысыбзэк1и литературэм ехьыл1эгъэ тхылъ, статья пчъагъэ, гурыт еджап1эм пае егъэджэн 1эпы1эгъухэр къызэрэдигъэк1ыгъэхэр, усэ тхылъэу «Жъогъохэчъ», «Тятэжъ п1ашъэмэ яосыет» зыфи1орэ тарихъ романыр къызэрэхиутыгъэхэр. Ахъмэт Джульетэ уасэ къаритыгъ усак1ом, ш1эныгъэлэжьым ытхыгъэхэм, к1элэегъаджэу 1оф зэриш1агъэм.
Ящэнэрэ зэхахьэр Дунэе зэнэкъокъухэм ялауреатэу Гъуагъо Дамир ихьак1эщ концерт Къэралыгъо филармонием щырек1ок1ыгъ, ащ тистудентхэри хэлэжьагъэх ык1и щедэ1угъэх. Зэхахьэр зезыщагъэр журналист ц1эры1оу Т1эшъу Светлан. Гъуагъо Дамир (я 35-рэ лицеим щеджэ, илъэс 15 ыныбжь) шык1эпщынэм, адыгэ, осетин, нэмыц пщынэмэ къяуагъ. Шык1эпщынаом ик1элэегъаджэу, Адыгэ Республикэм иц1ыф гъэш1уагъэу Гъук1э Замудин орэды1о купэу «Жъыу»-р игъусэу хэлэжьагъ, нартмэ яхьыл1эгъэ орэдыжъхэр къа1уагъ. Ахэмэ анэмык1эу концертым и1ахь къыхилъхьагъ орэды1о купэу «Тыжьын», Сихъу Джэнэт, Пашты Гупсэ, Л1ыбзу Шан, Л1ыбзу Джанти орэдхэр къа1уагъ, шык1эпщынэм къеуагъэх. Тистудентэу Жарэкъо Шумафэ пхъэк1ычым къеуагъ. Нэгъэрэкъо Казбек къамылым, шык1эпщынэм ягъусэу хъохъухэр къы1уагъ. Зэрэразэхэр къыхагъэщызэ, концертым ик1эух нэбгырэ пчъагъэ къэгущы1агъ.
