ДУНЭЕ Ш1ЭНЫГЪЭ КОНФЕРЕНЦИЕР
Адыгэ факультетым АКъУ-м и Ш1эныгъэ тхылъеджап1э гъэтхапэм и 15-м Дунэе ш1эныгъэ конференциеу«Адыгабзэр джырэ лингвокультурнэ шъолъырым зэрэхэуцорэр» зыфи1орэр щыригъэк1ок1ыгъ. Мы зэхахьэр ныдэлъфыбзэм фэгъэхьыгъэ тхьамафэм ик1эух. Конференцием къек1ол1агъэх ш1эныгъэлэжьхэр, к1элэегъаджэхэр, студентхэр, Тыркуем Илдыз Техник Университетым ик1элэегъаджэ, Германием СИЛ Интерннэшнел Лингвистикэм идунэе институт и1офыш1эхэр.
Пленарнэ зэхэсыгъом нэбгырибгъу къыщыгущы1агъ. Адыгэ бзэш1эныгъэм; адыгэ литературэм, 1оры1уатэм, зэдзэк1ыным; адыгабзэмрэ литературэмрэ язэгъэш1эн иметодикэ яхьыл1эгъэ секциехэм 1оф аш1агъ. Зэк1эмк1и темэу къатыгъэр, программэм хэтхагъэхэр 67-рэ мэхъу, къэгущы1энэу игъо ифагъэр нахь мак1. Конференцием къек1ол1агъэхэр игъэк1отыгъэу адыгабзэм непэ изэгъэш1эн изытет къытегущы1агъэх: егъэджэныр технологияк1эхэм атетэу зэрэбгъэпсыщтыр, еджап1эхэмрэ к1элэц1ык1у 1ыгъып1эхэмрэ адыгабзэр зэрэщябгъэш1эщт амалхэр, ныдэлъфыбзэм икъэухъумэнк1э АР-м и Л1ышъхьэ иунашъок1э проектнэ офисэу зэхащагъэм иапэрэ 1офш1агъэхэр, бзэш1эныгъэр ыпэк1э зэрэлъыбгъэк1отэщтыр.
Ш1эныгъэ зэхахьэр гъэш1эгъонэу рек1ок1ыгъ, презентациехэр бэу щагъэфедагъ, щызэнэкъокъугъэх. Анахьэу агу рихьыгъэхэр нэмыц к1алэу Феер Райнер адыгабзэр зэрэзэригъаш1эрэ методикэу къыгъэлъэгъуагъэр, Тыркуем къик1ыгъэ Кобл Алааттин Байрам къыхигъэщыгъэхэр, Тихоновэ Азэ хьатмэ абзэ ехьыл1агъэу къы1отагъэр. Зэхахьэм ик1эух аш1эщтхэр зэрыт проектыр къек1ол1агъэмэ зэдаштагъ
