БЗЭ ДЖЭГУК1ЭХЭР

      Гъэтхапэм  и 13-м  «Бзэ джэгук1э зэнэкъокъу» зыфи1орэр адыгэ факультетым щырек1ок1ыгъ.  Зыгъэхьазэрыгъэр ык1и  зезыщагъэр  адыгэ кафедрэм  идоцентэу  Блыпэшъэо  Мир.  Зэнэкъокъум хэлэжьагъэхэр: лъэпкъ факультетым иапэрэ курс ык1и  адыгэ к1элэегъэджэ колледжым ащеджэхэрэр.

    Бзэ джэгук1эхэр гъэш1эгъонэу зэхэщэгъагъэ: нэбгырэ хырых хъурэ купит1ум чэзыу-чэзыоу гъэцэк1энхэр уцуп1эмэ къахахыщтыгъэ, джэуапыр тэрэзмэ жюрим хэсхэм баллхэр агъэуцущтыгъэ. Упч1э-гъэцэк1энхэр зэрылъ уцуп1эхэр 10 хъущтыгъэ: «Тамыгъэкой», «Мэкъэхьабл», «Сурэттэмашъхь», «1оры1отэхьабл», «Лексикъуай», «Мэхьанэхьабл», «Гущы1эгъэпс псынэк1эчъ», «Бзэгущы1эхьабл», «Тесттэмашъхь», «Орэды1охьабл». Хэлэжьагъэхэми, еплъыгъэхэми бзэ джэгук1эхэр лъэшэу агу рихьыгъ. Тигуапэ хъугъэр Германием къик1ыгъэ к1элак1эу, адыгабзэр илъэсрэ ныкъорэ хъугъэу зэзгъаш1эрэ Райн зэрэхэлэжьагъэр ары.

       Бзэ джэгук1э зэнэкъокъум ик1эуххэр: адыгэ педколледжым икуп – баллэу 62-рэ, адыгэ факультетым – баллэу 60. Анахь чанэу хэлэжьагъэхэр, анахь гъэцэк1эн гъэш1эгъонхэр жюрим къыгъэнэфагъэх, ш1ухьафтынхэр аратыгъэх.