Усак1оу Енэмыкъо Мэулид илъэс 70-рэ зэрэхъугъэм фэгъэхьыгъэ литературнэ зэхахьэр

  Гъэтхэпэ мазэм и 26-м адыгэ факультетым щырек1ок1ыгъ усак1оу, тхак1оу, зэдзэк1ак1оу Енэмыкъо Мэулид фэгъэхьыгъэ литературнэ зэхахьэр. Ащ къек1ол1агъэх усак1ом и1ахьылхэр, иныбджэгъухэр, к1элэегъаджэхэр, студентхэр. Мэулид Тыркуем къыщыхъугъ, щеджагъ, 1оф щиш1агъ, илъэс 20 фэдиз хъугъэ ч1ыгужъым къызигъэзэжьыгъэр.

Мэулид хэкум къыщыдигъэк1ыгъэх усэ тхылъэу «Къушъхьэ гупшысэхэр», адыгабзэк1э зэридзэк1ыгъэу Четин Онэр ироманэу «Гугъэ мыухыжьхэр». Енэмыкъо Мэулид Тыркуем къыщыхиутыгъэх рассказ 30-м ехъу, поэмэ, повесть пчъагъэ, тыркубзэк1э зэридзэк1ыгъэхэу «Шыу закъу» К1эрэщэ Тембот, «Бзыикъо зау», «Мыжъошъхьал», «Къок1ып1эм - къохьап1эм» Мэщбэш1э Исхьакъ. Ахэм анэмык1эу тырку тхак1оу Яшар Кемал ироманэу «Хыр гусагъэ» зыфи1орэр адыгабзэм рилъхьагъ, къыдэк1ыным фегъэхьазыры. Мэулид Урысыем итхак1охэм я Союз аштагъ, лъэпкъ факультетым иадыгэ Гупчэ илъэс пчъагъэрэ щылэжьагъ, усэк1о ныбжьык1эмэ тхэн 1эпэ1эсэныгъэмк1э 1оф адиш1агъ.

Зэхахьэр профессорэу Унэрэкъо Рае зэрищагъ, Мэулид ищы1эныгъэ, итворчествэ доцентэу Хъуажъ Нурет къытегущы1агъ. Студентхэу Нэхэе Асыет, Тхьагъэпсэу Изабеллэ, Бэрэкъэе Маринэ, Т1эшъу Фаризэт, Ибрахьим Фатинэ, Шъхьэлэхъо Нафсэт зэ1ук1эгъум Мэулид иусэхэм къыщяджагъэх. Адыгэ Республикэм щызэлъаш1эрэ ц1ыфэу Гъук1э Замудин орэдыжъхэр зэхахьэм къыщи1уагъэх. Ащ къыщыгущы1агъэх усак1ор илъэсыбэ хъугъэу зыш1эхэрэ Т1ыжъ Джэмил, Чэтэо Ибрахьим, Беданэкъо Нихьат, Паштэ Мадинэ, Хьамырзэкъо Нуриет, Емык1 Нурджан.

Енэмыкъо Мэулид гущы1э зыратым, иусэмэ къяджагъ, факультетым зэрэфэразэр къы1уагъ. Зэхахьэр дахэу рек1ок1ыгъ, къек1ол1агъэхэми, къэгущы1агъэхэми рэзэныгъэр къахэщэу зэбгырык1ыжьыгъэх.