Гъэтхапэм и 14-м адыгабзэмрэ тхыбзэмрэ я Мафэ хагъэунэфык1ыгъ
Гъэтхапэм и 14-м Адыгабзэмрэ тхыбзэмрэ ямафэ фэгъэхьыгъэ ш1эныгъэ конференциеу «Джырэ адыгабзэм изэгъэш1эн изытет» зышъхьэр АКЪУ-м иш1эныгъэ библиотекэ Адыгэ филологиемрэ культурэмрэ яфакультет зик1эщак1ор щыхагъэунэфык1ыгъ.
Конференцием Адыгеим ирайонхэм къарык1ыгъэ к1элэегъаджэхэр, факультетым ик1элэегъаджэхэр, студентхэр, Адыгэ ш1эныгъэ институтым и1офыш1эхэр, Адыгэ Хасэм ил1ык1охэр, нэмык1хэри хэлэжьагъэх.
Конференциер къызэ1уихыгъ ык1и зэрищагъ адыгэ филологиемрэ культурэмрэ яфакультет идеканэу, адыгэ филологием икафедрэ ипащэу Хьамырзэкъо Нуриет. Пстэуми апэу ш1уфэс гущы1э къыш1ыгъ Университетым иректорэу Хъунэго Рэщыдэ. Ащ игущы1э щыхигъэунэфык1ыгъ лъэпкъыбзэм мэхьанэшхо зэри1эр, культурэм ылъапсэу зэрэщытыр ык1и узэрэфэсакъын фаер. Нэужым мэфэк1ым хэлэжьагъ Адыгэ Республикэм хэутын 1офхэмк1э и Комитет ипащэу Шъхьалэхъо Аскэр. Адыгабзэк1э зыщыгущы1эхэрэ унагъохэм арыс к1элэц1ык1ухэм бзэр як1асэу къызэрэтэджыщтхэм ана1э тыраригъэдзагъ.
Джащ фэдэу доклад зэфэшъхьафхэу адыгабзэмрэ тхыбзэмрэ афэгъэхьыгъэхэр къаш1ыгъэх: филологие ш1эныгъэхэмк1э докторэу, АРИГИ-м идиректорэу Бырсыр Батырбый, адыгэ филологиемрэ культурэмрэк1э ифакультет адыгабзэмк1э ик1элэегъаджэу Хьак1эмыз Мирэ, ш1эныгъэлэжьэу Абрэдж Ачэрдан, лъэпкъ театрэм ихудожественнэ пащэу Шъхьалэхъо Светланэ. «Адыгэ бзэш1эныгъэм» ык1и « Адыгабзэм иегъэджэн» зыфи1орэ секциехэм конференциер лъагъэк1отагъ.
Мыхэм темэ 50-м ехъу ащытегущы1агъэх. Ш1эныгъэ конференциер мэфэ реным к1уагъэ. Адыгабзэм изытет нахьыш1у ш1ыгъэныр изэфэхьысыжь.